حوار الكاتبة زهراء الفتلاوي مع طيف ضيفة مجلة الاصرار الثقافية
في البداية ارحب بكِ في مجلة الاصرار الثقافية ونبدأ بأحد الاسألة المهمة من هي طيف؟
اهلاً و سهلاً بيج ، طيف بنت عراقية من مواليد ٢٠٠١ ومن سكنة بغداد
انسانة جداً طموحة وشغوفة و تحب الخير للكل .
ادرس الطب العام ، و اعمل بمجال التسويق الالكتروني ( الالكتروني و ليس الهرمي ) .
احب السوشيال ميديا الى حد ما ، فقط في اطار التاثير الايجابي على حياة الناس وسلوكياتهم و بالتالي اختاريت ان اكون صانعة محتوى او مؤثرة على مواقع التواصل الاجتماعي .
لو كان عليكِ أن تستمري في مجال واحد من المجالات التي انتِ بها الآن فأي مجال سيكون؟
يمكن من رأيي هذا الشي صعب يصير ، و اني ضد ان اكون مخيرة بحياتي بين شغلتين
لان اكيد اني احب كل اختياراتي ولكن
لو اضطريت فـ راح اختار الطب العام بلا شك ولا تردد .
مهنة انسانية ، نكسب بيها الدنيا و الاخرة .
فـ بالتالي كلشي زائل و الانسان لازم يضمن اخرته .
كيف خطرت فكرة العمل بمجال بعيد عن الطب عند طيف؟
قبل ما اتخرج من السادس الاعدادي ، جان هدفي ادرس واشتغل
فكرة الاستقرار و الاستقلال المالي والدتي زرعتها بيه و خلتني اعرف ان من القوة استقل .
يمكن بـ اول الامر مچان مهم شنو اشتغل بكد ما مهم اشتغل ( وهاي كارثة حقيقة ) .
و بالتالي اني اشتغلت بعدة مجالات وكلها بعيدة عن الطب كون ماكو عمل بالمجال الطبي لطالب الطب .
بعدها صار عندي مفهوم اهمية اي سلك اشتغل بي
و هل هو ديضيف الي او لا ؟
مهم او لا ؟
يستحق امضي عمري بي ؟
و استقرت مؤخراً من سنة بمجال التسويق .
بالعموم ، العمل شيء مهم بحياة الانسان بغض النظر عن كونه بـ اختصاصه او لا
لان احنه في زمن الانترنت ، الوصول سريعاً لكلشي
و صار تگدر تتعلم ، و تحترف اي مجال يجي ع بالك
المهم يكون اختيار مناسب ان تمضي عمرك بي ويعود بفائدة .
طيب طيف كيف تتعاملين مع ضغوط العمل والمواعيد؟
ما اريد اوهمج بحياة الانتاجية و الانضباط او اوهم اي احد .
ولكن ، قدر الامكان اني احاول اكون انسانة مسيطرة على
نفسي ووقتي ومواعيدي و ضغوط العمل .
قد بعض الاحيان ، " انهار " وهذا شي جداً طبيعي
و ارجع من جديد اكمل
ضغوط العمل ما تنتهي
و بعمرك ما تكدر تسوي ادارة تامة وكاملة عليها
فـ انك تتعود و تحس الوضع طبيعي هو الافضل كل النواحي .
بالاضافة الى ، وجود العائلة و الاصدقاء
دعمهم وتشجيعهم وايمانهم بيه يشكل فرق جداً
عداها بعض الاصدقاء دايماً يساعدوني و ممكن يخففون العمل عني .
طيب كيف هي علاقه طيف بعائلتها؟
علاقة بعض الاحيان تكون صحية وبعض الاحيان تكون حالها
حال علاقة اي بنت " عراقية " بـ اهلها
بعض الاحيان ، التفهم سائد
الدعم والتشجيع مستمر
و بعض الاحيان القليلة جداً
حالي حال اي بنت اهلها يخافون عليها بسبب الحياة و الوضع
و المجتمع العراقي بصورة عامة
فـ اواجه رفض ومنع من بعض الاشياء
ولكن هم داعمين و ساندين بشكل قوي جداً
ومؤمنين بـ طيف و اختياراتها مهما كانت
يمكن بـ الاول مجانوا هيج خوفاً عليه
بس حالياً طيف ثبتت نفسها وكسبت ثقة اهلها التامة .
اغيب عنهم هواي بسبب صعوبة دراستي و عملي
ولكن هُمَ متفهمين جداً 🙏🏻
رائي عائلة طيف بدخولها مجال الطب كيف كان؟
يمكن حالهم حال اي اهل
فرحانين وفخورين !
بس الاهم انو ما يربطون نجاحي كـ شخص هو دخولي كلية الطب .
ولا يربطون قيمتي كـ شخص بالطب
ولهذا تشوفيهم يشجعوني اسوي اشياء ثانية لمصلحتي وحياتي .
متى عرفت طيف أن الطب هو الاختصاص المناسب لها؟
يمكن من زمان چنت اشوف المجال الطبي هو المقصد الي اريد اسعى اله .
ولكن الطب تحديداً
چنت اكول
" الطب يستحق شخص مثلي ، مو اني استحق الطب "
وهاي الرؤية صارت عندي بالسادس الاعدادي
ممكن قبلها جنت اريد الطب
لانه مهنة انسانية
ومتاثرة بقول الامام الشافعي
" لا أعلم بعد الحلال والحرام أنبل من الطب "
وچنت من عمر ١٢ سنة متطوعة مدنية بمجال الحملات
والتبرعات الخيرية
ونشطت بعمر الـ ١٤ او ١٥ لدرجة تأسيس فريق لاغاثة النازحين
فـ روحي تعودت على المساعدة وصارت تعتبرها غذاء روحي .
اكثر مجال يتم بي مساعدة الناس واغاثتهم هو الطب .
و بالتالي هو الاختصاص المناسب .
ماهي رؤيتكِ حول مستقبل الطب في العراق؟
ماعنده اي مُستقبل ، المعطيات والمؤشرات الحالية تگول هيچي ..
ما الإنجاز الأكبر الذي تفتخر بهِ طيف؟
يمكن فكري وعقليتي وشخصي ...
لان كل افعالي ، كل شي احققه ، كل شي اوصل اله ، كلشي
اسوي لنفسي او للناس
هو نتاج عقلي وتفكيري .
كيف تتعاملين مع اخطائك ؟
اني شخص جداً يحب يعترف بـ اخطائة
ف يمكن اول شي واهم شي اسوي هو اعترف بيها وبوجودها .
بعض الاخطاء طبيعية ، بلاخير اني بشر ونفس بشرية تخطأ وتصيب
فـ اتقبلها ، ثم احاول اغيرها اذا كدرت
الاخطاء الي مو طبيعية هي الي تكون انعكاسها ع محيطي مو عليه
وهاي من الاساس اتجنبها .
ماهي أفضل صفة تحبها طيف بطيف؟
النقاوة الي امتلكها .
يمكن هاي تريح الناس مني
وتريحني من كلشي .
تنطيني السلام الداخلي الي اغلبنا نسعى اله ، و تنطيني هدوء
لان بسببها
اتجنب المشاكل
اتجنب افتعالها
اتجنب اذى الناس
و غيرها
هل ترسمين أهدافكِ للمدى البعيد أم تكتفين بلتخطيط لفترة زمنية محددة؟
ضروري يكون عدنا رؤية على المدى البعيد لكلشي بحياتنا
و لكن بلاخير ماراح يصير الا الي ربنا كاتبه
ف ممكن احط اهداف ورؤية على مدى بعيد
بس مو شرط تتحقق
بس راح يتحقق الشي الافضل والي يريده ربي الي
الي على مستوى فترات زمنية محددة اكيد
صار سلوك يومي انو واحد يخطط يومه
وممكن اسبوعه وشهره ايضاً .
في كل عمل او مجال نجد الصعوبات فما هي ابرز الصعوبات التي واجهت طيف؟
الرفض .
دايماً ابدي بوقت عمري صغير بـ اشياء الناس تشوفها مفروض تبدي بوقت لاحق
وعدهم مفهوم
عيش كل عمر بعمره
هالمفهوم اني وياه
بس الى حد ما
بلاخير كل الامور نسبية وماكو شي مُطلق !
من واني عمري ١٢ و بلشت بالعمل الانساني
لگيت رفض بسبب عمري
وصولاً الى عملي حالياً
ايضاً نرفضت بسبب عمري
او الناس ترفض فكرة طالب طب يشتغل
او ترفض ان بهل عمر بدال ما تركز على دراستك فقط
تبدي تركز على حياتك المهنية
وكل الافكار و المساعي بحياتها
بـ اولها عانيت من رفض بسبب عمري .
بس يمكن هذا الرفض هو السبب بنجاحي بهواي امور بحياتي .
هل كان لاحد دور في ان تجتاز طيف الايام الصعبة؟
اكيد ، رب العالمين
الاهل و الاصدقاء 🙏🏻
ومن اكول اهل و اصدقاء ف اني اعني حتى مُتابعيني
نقطة التغير في حياة طيف؟
نقطتين
١- ماطلعت معدل الطب و اعادتي للسنة وحصولي ع الطب
٢- العمل و الاختلاط بالمجتمع
كيف كانت طفولة طيف؟
مچانت سهلة و لا عادية ابداً ....
و اكتفي بهذا الرد .
كم تقييمي ما وصلتي لهٌ الان؟
الحمدلله مو بالشي القليل ابداً مقارنة بعُمري
اذا كان لديكِ ورقة توضح تاريخ وفاتك هل تفتحيها ام لا؟ ولماذا؟
ابداً
ماكو فائدة من معرفتي لتاريخ وفاتي وبالتالي مو مهم اعرفه .
حلو فكرة انو
تعيش الحياة كانك تعيش ابدا
وتعمل لاخرتك كانك تموت غدا .
هل إثرت السوشيال ميديا على طيف؟
اكيد ، اثرت على الكل
بس بالذات اني يمكن خلتني اكثر مسؤولية من طيف قبل الميديا ؟
فكرة انو عدك متابعين ، يقتدون بيك وياثرون وتاثر
عليهم فكرة مرعبة ومخيفة
فكرة دايماً يكلولي أنـتِ قدوة
يخليني اتجنب الاخطاء
و اتجه للاشياء الصح
لان تاثيري مو بس ع نفسي
وانما ع مجتمع يتابعني .
كيف ترى طيف الحياة من وجهة نضرها في السنوات الخمس القادمة؟
بعمري ما فكرت هيجي يمكن ،
لان كل يوم و كل دقيقة وكل ثانية تمر يتغير تفكيرنا
فـ كيفما ٥ سنوات؟
كلمة أو جملة ترغبين في إيصالها لقارئ هذا الحوار
الميديا مو كلش حقيقية
اخذ الزين منها
واترك الشين
كون منطقي وواقعي وحقيقي
و تصرف على اساس طبيعتك البشرية
لا بأس باكتساب العادات الجيدة
و بناء الذات و تطويرها .
ولكن ماكو انسان مثالي ابداً
مهما ظهرت الميديا .
و الايجابية و الانتاجية اكثر مصطلحين بالميديا بس لا تعني
هاي المصطلحات المثالية المطلقة
و لا تعني انك ترفض طبيعتك
من الاخطاء
و التسويف
و الاهمال
وتدخل بدوامة القالب المثالي الي حاطته الميديا .
كلنا نسعى للمثالية وهذا الشي الصح الوحيد
سعي فقط
والوصول صعب مقارنة بطبيعة البشرية .
طيف كان حوار شيق و ممتع جداً مع حضرتك اسعدني تواجدك جداً
شُـكراً جداً زهراء على هاي الفرصة ، اتمنالج كل التوفيق والنجاح 🙏🏻
ليست هناك تعليقات:
إرسال تعليق